༄༅།།...

༄༅།། སྐྱབས་རྗེ་བསེ་ཚང་བློ་བཟང་དཔལ་ལྡན་ཆོས་ཀྱི་རྡོ་རྗེ་མཆོག་གིས་དེ་རིང་སྔ་དྲོ་ཆུ་ཚོད་༡༠་༣༠སྟེང་མདོ་སྨད་རྔ་བ་ཁུལ་མཛོད་དགེ་རྫོང་ཐང་སྐོར་ཡུལ་ཚོའི་བཀྲ་ཤིས་སེམས་སྐྱིད་ཐང་དུ་དཔལ་དུས་ཀྱི་འཁོར་ལོའི་དབང་གི་སྟ་གོན་གྱི་འགོ་བཟུང་སྟེ་རྒྱ་བོད་ཀྱི་དད་ལྡན་སློབ་འབངས་ཁྲི་སུམ་ཅུ་ལྷག་ལ་སྔོན་འགྲོའི་བཀའ་སློབ་གསུངས་དོན། སྤྱིར་བོད་གངས་ཅན་གྱི་ལྗོངས་ནི་འཕགས་པ་སྤྱན་རས་གཟིགས་ཀྱི་གདུལ་ཞིང་དངོས་ཡིན་པ་མ་ཟད་བོད་མི་ནི་ཨ་མ་དང་མ་ཎིའི་མིང་ལྷན་དུ་ཤེས་པའི་ཆོས་ལ་དད་སེམས་ཆེ་ཞིང་རྒྱུད་ལ་སྙིང་རྗེ་ལྡན་པའི་མི་རིགས་སེམས་བཟང་གཞུང་དྲང་ཞིག་ཡིན། དེའི་ཕྱིར། བོད་མི་ཡོངས་ཀྱིས་དུས་རྒྱུན་འཚོ་བའི་ཁྲོད་མ་ཎི་ཡི་གེ་དྲུག་མ་ཆགས་མེད་དུ་འདོན་རྒྱུ་དང་དགེ་སྒྲུབ་སྡིག་སྤོང་གི་ཕྱོགས་ལ་གང་ཐུབ་ཅི་ཐུབ་རེ་བྱེད་རྒྱུ། དེ་མིན། བོད་མི་རིགས་ནང་ཁུལ་ལ་འཁྲུག་འཛིང་དང་། ནང་དམེ། རྐུན་ཇག་སོགས་བྱ་སྤྱོད་ངན་པའི་རིགས་མི་བྱེད་པར་རང་མི་རིགས་ཀྱི་བར་ལ་མཐུན་སྒྲིལ་དམ་པོ་བྱས་ཏེ་གཅིག་ཕན་གཅིག་གྲོགས་ཀྱི་ཕྱོགས་ལ་འབད་པ་བྱེད་རྒྱུ་ནི་གལ་ཆེན་ནང་གི་དོན་ཆེན་ཡིན་པ་དང་། བསླབ་པ་སློབ་གཉེར་གནང་མཁན་ཚོ་ཡིན་ནའང་སློབ་གཉེར་གྱི་ཕྱོགས་ལ་འབད་པ་ལྷོད་མེད་བྱེད་དགོས། གཞན་མི་རིགས་སུ་དང་སུ་ཡིན་རུང་མི་རིགས་ཕན་ཚུན་བར་མཐུན་སྒྲིལ་དང་ཕན་སེམས་འཛིན་རྒྱུ་ནི་ཧ་ཅང་གལ་ཆེན་ཡིན་པ་སོགས་ཀྱི་བཀའ་སློབ་ཡུན་རིང་དུ་གནང་སྟེ་ཉིན་གུང་ཆུ་ཚོད་༡༢་༣༠སྟེང་དབང་སྟ་གོན་གྱི་མཇུག་ཡོངས་སུ་བསྒྲིལ། དེ་ནས་ཆུ་ཚོད་ཕྱེད་ཀའི་རྗེས་སུ་རྟགས་དང་རྟེན་འབྲེལ་འཛོམས་པའི་ཆར་བ་ངོ་མཚར་ལྡན་པ་ཞིག་བབས་སོང་། དད་ལྡན་སློབ་འབངས་ཡོངས་ཀྱིས་ཇི་འདྲའི་རྟགས་དང་རྟེན་འབྲེལ་འཛོམས་པའི་ཆར་བ་ཡག་པོ་ཞིག་བབས་སོང་ཞེས་བསྔགས་བརྗོད་མེ་ཏོག་གི་ཕྲེང་བ་མང་དུ་འཐོར་བཞིན་དགའ་དད་སྤྲོ་གསུམ་གྱིས་དད་གུས་མང་དུ་ཕུལ།
http://cutt.com/weizhan/article/101029934/3864511098/110768