ཟླ་འདིའི་ཕྱི་ཚེས་...

ཟླ་འདིའི་ཕྱི་ཚེས་ ༩ ཉིན་གྱི་ཕྱི་དྲོར་ཀ་ལོན་སྦུག་གི་ཉེ་འཁྲིས་སུ་ཡོད་པའི་ས་གནས་ཨ་ལེད་ཅི་ཀོད་པུ་(Alaichikhop)ནས་ཡིན་པའི་རང་ལོ་ ༡༤ ཡིན་པ་བུ་མོ་སཱ་རེས་ཀཱ་ (sarika) ཟེར་བ་ཞིག་ལ། གླ་གཏོང་རླངས་འཁོར་ཁ་ལོ་ཞིག་དང་། ཁོང་གི་གྲོགས་པོ་གྲྭ་བ་གསུམ་བཅས་ཀྱིས་བཙན་གཡེམ་བྱས་ཡོད་འདུག

གནང་ཚུལ་ནང་བཀོད་དོན། ཟླ་འདིའི་ཕྱི་ཚེས་ ༩ ཉིན་ཕྱི་དྲོ་བུ་མོ་དེ་སྨན་ཞིག་ཉོ་ཆེད་ཀ་ལོན་སྦུག་གྲོང་ཁྱེར་དུ་སོང་སྟེ། ཕྱིར་གོམ་པ་བརྒྱབ་ནས་རང་ཁྱིམ་དུ་ལོག་སྐབས། གླ་གཏོང་རླངས་འཁོར་མཱ་རོ་ཊི(MarutiVan)ཡི་ཁ་ལོ་བ་ཀཱ་རན་རོད་ཀཱས་(Karan Roka)ཟེར་བ་ཞིག་གིས་ཁོ་མོར་གླ་མི་ལེན་པར་ཁྱིམ་དུ་བསྐྱལ་རྒྱུ་ཡིན་སྐོར་བརྗོད་ནས་ཁོའི་རླངས་འཁོར་ནང་བཞག་ཡོད་པ་དང་། ལམ་བར་དུ་ཁོ་མོར་བཟི་སྨན་གང་རུང་ཞིག་སྤྲད་དེ་དྲན་པ་འཐོར་དུ་བཅུག་རྗེས། ཁོང་གི་གྲོགས་པོ་གྲྭ་བ་གསུམ་སྐད་བཏང་ནས་བུ་མོ་དེར་བཙན་གཡེམ་བྱས་ཡོད་པ་དང་། དེའི་རྗེས་ཁོ་མོ་རང་ཁྱིམ་འགྲམ་གྱི་ནགས་གསེབ་ཏུ་གཡུགས་ནས་ཕྱིན་ཡོད་འདུག

ཉིན་དེའི་དགོང་མོའི་ཆུ་ཚོད་ ༡༠ པའི་སྟེང་། གྲོང་གསེབ་དེའི་མི་ཁ་ཤས་ཀྱིས་ཁོ་མོ་མཐོང་ནས་སཱ་རེས་ཀཱ་(sarika) ཡིན་པ་ངོ་རྟགས་ཆོད་ཅིང་། དེ་མ་ཐག་ཀ་ལོན་སྦུག་སྨན་ཁང་དུ་འཁྱེར་ཡོད་པ་དང་། ས་གནས་ཉེན་རྟོག་ལས་ཁུངས་ལ་ཐོ་འགོད་(FIR)བྱས་འདུག ཁོ་མོའི་གཟུགས་པོའི་གནས་སྟངས་སྐོར་ལ་འབྲེལ་ཡོད་སྨན་པས་ད་སྔ་གང་ཡང་བརྗོད་མེད་ཀྱང་། ཁོ་མོས་མོར་བཙན་གཡེམ་བྱེད་མཁན་དེ་དག་ངོ་ཤེས་ཀྱི་ཡོད་ཚུལ་བརྗོད་ཡོད་འདུག

དེའི་རྗེས་ས་གནས་ཉེན་རྟོག་པས་བཙན་གཡེམ་བྱེད་མཁན་དག་འཛིན་བཟུང་གིས་འདྲི་རྩད་བྱས་ཡོད་འདུག་ལ། ཉེས་ཅན་དེ་བཞི་ནི་གླ་གཏོང་རླངས་འཁོར་ཁ་ལོ་བ་ཀཱ་རན་རོད་ཀཱས་དང་། ཁོང་གི་གྲོགས་པོ་གྲྭ་བསམ་གཏན་ཤེས་སྒྲུབ་(Samten Tshedup)དང་། ཕུར་བུ་རྡོ་རྗེ་(Phurba Dorjee)། ཟླ་བ་གྲགས་པ་(Dawa Dukpa)བཅས་ཡིན་སྐོར་སོགས་བཀོད་འདུག་ཀྱང་། གནས་ཚུལ་ནང་གྲྭ་བ་ཞེས་བརྗོད་ཡོད་པ་ཙམ་ལས་དགོན་པ་གང་ཡིན་པ་དང་། མི་རིགས་སུ་ཞིག་ཡིན་མིན་སོགས་ཁ་གསལ་མི་འདུག ད་ལྟ་ཁོང་ཚོར་རྒྱ་གར་གྱི་ཉེས་ཁྲིམས་ཨང་ ༣༧༦ ཞེས་པའི་འོག་བཀག་ཉར་བྱས་ཡོད་འདུག