Lhakar talk : "Five dangers to destruction of the...

Lhakar talk : "Five dangers to destruction of the Tibetan literary language" by Golok poet and scholar, Ju Kalsang
སྐད་ཡིག་འཇིག་པའི་ཉེན་ཁ་ལྔ།
མགོ་ལོག. འཇུ་སྐལ་བཟང་། མཉམ་འབྲེལ་རྒྱལ་ཚོགས་ཀྱིས་བཀོད་སྒྲིག་འོག་རྒྱལ་སྤྱིའི་སྐད་བརྡ་རིག་པའི་མཁས་དབང་དང་།སྐད་ཡིག་ཆེད་མཁས་པ་གང་མང་ལྷན་འཛོམས་ཀྱིས་སྐད་ཡིག་སྐོར་ལ་ཞིབ་འཇུག་བྱས།རྗེས་སྐད་ཡིག་འཇིག་པའི་ཉེན་གྱི་ཉེན་ཁ་ལྔ་ངོས་འཛིན་བྱས་འདུག དུས་རབས་ཉི་ཤུ་བའི་མགོ་སྟོད་དུ་འཛམ་གླིང་ན་སྐད་ཡིག་མི་འདྲ་བ་༦༩༠༠ལྷག་ཡོད་པར་ཚོད་དཔག་བྱས་འདུག་ཅིང་།དུས་རབས་ཉེར་གཅིག་པའི་མགོ་སྟོད་ལ་སླེབས་དུས་སྐད་ཡིག་༢༤༠༠ཙམ་ཉམས་ཚར་བ་དང་།ད་ལྟ་འཇིག་ཉེན་ཀྱི་སོ་ཁ་ན་ཡོད་པ་དང་།མི་རང་བར་འཇིག་ཉེན་གྱི་དཀའ་ངལ་ཡོད་པ།དུས་ཡུན་རིང་ཙམ་གྱི་རྗེས་ནས་ཉམས་རྒུད་དུ་འགྲོ་སྲིད་པའི་སྐད་ཡིག་༤༤༠༠ཙམ་ངོས་འཛིན་བྱས་འདུག. ༡སྐད་ཡིག་ལ་མི་སེར་འདུས་སྡོད་ཀྱི་ཉེན་ཁ། མི་སེར་གཞན་གྱི་ས་ཐོག་ལ་ཕར་སོང་ནས་མི་རིགས་གཞན་གྱི་ནང་ལ་འཐིམ་ཉེན་ཆེ་བ་དང་།མི་རིགས་གཞན་ཚུར་ཡོང་ནས་གཞིས་ཆགས་ཏེ་མི་རིགས་ཀྱི་གོམས་གཤིས་དང་འདུ་ཤེས་འཛིན་སྟངས་བཅས་པར་ལྷད་ཞུགས་ནས་དབང་སྒྱུར་བྱེད་ཉེན་ཆེ་བ་ལ་ཟེར། ༢སྐད་ཡིག་ལ་ཚོང་ལས་དཔལ་འབྱོར་གྱི་སྟོབས་ཤུགས་མེད་པའི་ཉེན་ཁ། སྤྱི་ཚོགས་ཀྱི་དཀྱིལ་སྙིང་དཔལ་འབྱོར་དང་ཚོང་ལས་ཡིན་པས་མི་རིགས་ཚང་མ་དེར་ཕྱོགས་དུས་དགོས་སྤྱོད་ཆེ་བའི་ཚོང་ལས་དང་དཔལ་འབྱོར་གྱི་ཁྱབ་ཁོངས་ནས་སྐད་ཡིག་དེ་བེད་སྤྱོད་བྱེད་དགོས་མོད། དེ་མེད་པ་སྟེ་སྐད་ཡིག་ལ་ཚོང་ལས་དཔལ་འབྱོར་གྱི་སྟོབས་ཤུགས་ཀྱིས་རམ་འདེགས་མ་ཐུབ་པ་ལ་ཟེར། ༣སྐད་ཡིག་ལ་ཆབ་སྲིད་ཀྱི་ཁེ་དབང་མེད་པའི་ཉེན་ཁ། ཚོགས་འདུ་སྐོང་བ་དང་འདེམས་བསྐོ་བྱེད་པ།རྒྱལ་ཁབ་ཀྱི་གཞུང་ཡིག་ཡར་གཏོང་མར་མངགས། ཁྲིམས་ཀྱི་རྒྱབ་རྩ།རྩ་འཛུགས་ཀྱི་བདག་པོ་མེད་པ་སྟེ་ཆབ་སྲིད་ཀྱི་ཁེ་དབང་དང་རྒྱབ་རྩ་མེད་པ་ལ་ཟེར། ༤མ་སྐད་ལ་དུངས་བ་མེད་པའི་ཉེན་ཁ། མི་རིགས་རང་གི་སྲོལ་རྒྱུན་རིག་གནས་ལ་དགག་རྒྱག་བྱེད་མཁན་མངོན་གསལ་གྱིས་ཡར་ལངས་པ།དགག་རྒྱག་གི་འདུ་འཛོམས་དང་རྩོམ་ཡིག་སྤེལ་བ།མི་རིགས་ཀྱི་སྐད་བརྡ་རྒན་རབས་དང་དར་མའི་ངག་ལས་གཞོན་སྐྱེས་དང་བྱིས་པའི་ངག་ན་གཏན་ནས་མེད་པ་དང་།ཡང་ན་ལྷད་མ་ཅན་ལས་མེད་པ།རྩོམ་པ་པོ་དང་ཞིབ་འཇུག་པའི་མིག་ནང་ན་ཡོད་ནའང་མང་ཚོགས་དང་འཛིན་སྐྱོང་།སློབ་མ་བཅས་ཀྱི་ལུས་ངག་ན་མེད་པ་སྟེ།མི་རིགས་དང་སྐད་ཡིག་ལ་འགལ་ཟླའི་བར་ཐག་ཤོར་བ་ལ་ཟེར། ༥སྐད་ཡིག་སྲོག་ཤིང་དུ་འཛིན་པའི་རིག་གནས་རྒུད་པའི་འཇིག་ཉེན། མི་རིགས་ཀྱི་སྐད་བརྡའི་སྲོག་ཤིང་བཟུང་བའི་ཆོས་ལུགས་དང་།རིག་རྩལ།སྒྱུ་རྩལ་སོགས་ཉམས་རྒུད་ཀྱི་གནས་སུ་གྱུར་བ་སོགས་ལ་ཟེར།